曼城心雄喪攻西布朗

猪拉多纳

26/12/2011
文： Mic少

英超榜首曼城今晚作客西布朗，曼城相隔八十二年後，再以一哥身份過聖誕，球隊愈來愈心雄，對聯賽冠軍寶座志在必得。呢支富豪球隊最大優勢係人腳充裕，即使面對聖誕新年緊密賽程，亦冇有怕，可以場場去盡。至於西布朗近期大踢性感足球，主場有望入波，無謂左度右度，一於直取入球大。（有線300及200台周一晚11時直播）


氹老細踢性感足球


曼城勝出率及入波數字均屬英超之冠，位居榜首絕對實至名歸，佢哋最令人讚賞地方係大踢進攻足球，十七場聯賽已入五十三球，平均每場有三球進帳，單靠自己都夠開大。原因好簡單，因為中東富豪老細文梳亞鍾意睇入波，球隊踢法愈悅目，佢愈高興，領隊文仙尼為咗令文梳亞繼續義無反顧大力投資，當然要投其所好。




最重要嘅係領隊文仙尼手上擁有大量精兵，即使聖誕新年緊密賽程，都唔需要擔心兵源問題，尤其係歐聯已出局，更加可以全力爭聯賽，以佢哋鼎盛中前場人腳，今次遇中游球隊西布朗，可放心盡情喪攻。




西布朗近況亦不俗，作客都連贏兩場，特別係上仗對紐卡素，踢出高昂鬥志，就算兩度被追平，最終都贏三比二，作客都咁進取，主場冇理由太退縮。仲有西布朗近五次主場對曼城，竟然贏咗四場，有呢個靚績支持，可提升球員信心，同對手搏槌。