紅魔未發洩夠炒起韋根

猪拉多纳

26/12/2011
文： 蘇豪

曼聯拆禮物日於主場迎戰韋根，雙方合演「大曼徹斯特市」打吡，「紅魔鬼」傷兵名單水蛇春咁長，不過，自從於歐聯出局後，曼聯球員場場都踢得好肉緊，精神面貌一流，今場又屬大炒格，熱捧大盤，要埋「讓球主勝」！(有線301及201台周一晚11時直播)




先列出曼聯目前主要傷兵先，守將尼曼查維迪、里奧費迪南、中場路爾斯安達臣、費查、湯卡華利、艾舒利楊格及前鋒奧雲等全部唔得，另一中場吉遜亦有傷上陣成疑，通天老倌菲爾鍾斯頰骨受傷，但情況唔算嚴重，今次可落場搏殺，中後場總算有番個大將壓陣。


歐聯出局後三連勝


「紅魔鬼」少埋艾舒利楊格，有人擔心球隊進攻火力受削，但隨住射手韋碧克及查維亞靴南迪斯復出後，大軍前線火力甚強，再者，大軍於歐聯畀巴素利踢出局後，近三場聯賽全勝，合共轟入十一球，射手朗尼入四球，一眾球星非常肉緊，領先後總不放鬆，決心極強。




韋根近況甚佳，對上兩場聯賽先後賽和車路士同利物浦，表現非常硬淨，不過，兩仗同屬主場賽事，今次作客奧脫福肯定會畀人壓住踢，未必頂得住。韋根今季作客曼城曾大敗0比3，面對另一同市球隊曼聯預計都冇運行，要入球大，捧埋「讓球主勝」。