利物浦夠力大番鋪

猪拉多纳

26/12/2011
文： 車車

利物浦上星期真係冇運行，除咗被韋根摸和外，蘇亞雷斯仲被重罰停賽八場！連塘邊鶴巴洛迪利都忍唔住話，冇證冇據單憑一面之詞都重罰仲成世界？雖然利物浦表明保留為蘇亞雷斯上訴嘅權利，但好似外間都唔多贊成紅軍再為呢件事糾纏落去，就連費爵爺都忍唔住搭嘴，話所有嘅反抗都係徒勞無功，激到班利迷吐血咁滯！唉，講真依家咁凍，慳番啖氣暖肚好過。


布力般冇得救


呢件事後，一班利記球員當然話冇受影響，仲話全力支持蘇亞雷斯，但睇見佢哋上場作客對韋根都贏唔到，都真係令人幾擔心，好彩今晚主場出擊，對手只係包尾嘅布力般流浪，我覺得紅軍呢個時候一定可以衝破黑暗時期贏波。




雖則紅軍近六場賽事都開入球細，攻力令人有懷疑，但早兩日杜帥話謝拉特同史比寧有可能今場復出，如果消息係堅，利記要炒布力般一定冇問題。因為布力般無論作客或主場一樣係輸波代表，近期已經連輸三場，而且今季作客未贏過，表現真係冇得救o架！




再睇埋往績，利物浦近四次主場對布力般取得全勝，而且都開大。實力、近況、往績無一利客隊，所以今晚我會全力支持利物浦重生，大炒布力般流浪。（有線202及302台周一晚11時直播）