英超Boxing Day維拉最大禮

猪拉多纳

26/12/2011


英超拆禮物日好戲連場，阿士東維拉最鍾意送「大」禮，佢哋過去五季有四季Boxing Day有比賽，結果四場都開大，其中○七年更同車路士打和四比四，但講到成績就麻麻，呢四場比賽只得二和二負，包括上季一比二輸畀熱刺。


富咸打吡不利


另一方面，富咸將連續五年喺Boxing Day踢倫敦打吡，今年對手係車路士，富咸之前四次拆禮物日踢打吡戰成為被「拆」對象，成績係二和二負，當中○七年作客被熱刺大炒五比一，上年主場一比三輸畀後來包尾降班嘅韋斯咸。至於車路士過去五年有四次喺拆禮物日比賽，成績為一勝三和。




此外，現時排榜尾嘅布力般流浪近三次喺Boxing Day出戰都開出入球細，而且三場都贏唔到，錄得二和一負。