拿玻里強勢搶主Ｗ

猪拉多纳

18/12/2011
文： 巨高

意甲周一凌晨直播拿玻里主場對羅馬。今季拿玻里聯賽表現略為退步，某程度上係受之前歐聯所影響。如今歐洲賽事暫且停火，拿玻里冇晒心理包袱跟身，對於整支球隊發揮必有幫助。羅馬已成冇牙老虎，相信西班牙教練安歷基仍需更多時間去調教，今場難以威脅到拿玻里，主Ｗ有1.77倍捧得過。（now 633及660周一凌晨3時45分直播）


歐聯出線士氣如虹


羅馬唔單止喺球場內踢唔出水準，球場外亦問題多，今次又輪到托迪「出事」。當地時間星期三球隊進行聖誕派對，期間有多名羅馬球迷湧上前侮辱托迪，大鬧羅馬王子對戰祖雲達斯時射失十二碼，直接累及球隊失分。及後托迪就大表不滿，話如果大家覺得佢係問題所在，佢會自動彈開無謂阻人發達。就連精神領袖都踢到冇晒癮，今場都幾難咧住班師弟仔作戰。離隊言論更嚴重影響羅馬士氣，對低沉嘅羅馬可謂雪上加霜。相反，拿玻里喺歐聯做到不可能創舉，壓倒曼城殺入十六強，個個球員都顯出打不死拚勁，士氣好過羅馬多多聲。