杜奧巴 林柏特有火

猪拉多纳

17/12/2011
文： 江忠德

「薑係愈老愈辣」，車路士砌低曼城皆大歡喜，大家仲有份一齊爭英超冠軍，兩件「老鬼」杜奧巴同林柏特（下圖）功勞最大，佢哋最憎畀人睇死話等掛靴，依家趁勢旺梗係去盡，韋根班守衞今仗真係有得震冇得瞓！




杜奧巴終於搶番做正選，喺連番建功之後，講句嘢都大聲啲，佢話自己同25歲後生仔一樣咁弗，事實上，佢嘅比賽態度遠勝「王子」費托，能夠帶動隊友肯搏命，話佢係還魂丹一啲都唔誇張。




杜奧巴下個月就會離隊去踢非洲盃，踢完返嚟仲係唔係四肢健全都好難話得埋，「藍戰士」點都用到盡先至放人！至於林柏特話佢無端端被貶為後備認真冇厘頭，一定要爭番做正選，難得佢同杜奧巴成33歲人都仲係咁有火，試問韋根點頂！


維拉紅軍「細」均力敵


至於禮拜日晚有維拉迎戰利物浦，呢兩隊都係前10位入波第2少嘅球隊，睇怕都幾難擦出火花。「紅軍」呢季最閉翳係遇強不弱，遇弱不強，而維拉喺主場亦唔差，真係「細」均力敵㗎。