藍綠大戰撐史浩克

猪拉多纳

17/12/2011
文： 蘇斯黑柴

今晚德甲尾場上演藍綠大戰，史浩克04主場鬥雲達不來梅，兩軍目前都位列聯賽榜前五名，不過不來梅今季遇強必敗、作客奇差、陣容不整加上往績輸蝕，史浩克集有利條件於一身，黑柴推介1.82倍主Ｗ。（有線61及201台周日凌晨1時30分直播）




不來梅目前聯賽排第五，只落後排第三嘅今仗對手史浩克兩分，計成績已經算唔曳，畢竟今季平均人腳實力有所下降，不過佢哋主要靠主場同對弱旅攞分，遇強隊冇啖好食，計目前聯賽榜前六名球隊，除咗今仗對史浩克外，不來梅今季對其他四強（利華古遜、多蒙特、慕遜加柏同拜仁慕尼黑）都輸晒，而一直喺前線單天保至尊嘅射手比沙路，今季已經有12個入球同7次助攻，但遇上上述四強毫無建樹。




不來梅今季八場作客聯賽輸咗四場，近兩場作客對住慕遜加柏同拜仁夾埋共失9球，今仗中堅柏柏斯達夫普路斯同中場肯特停賽，保路斯基同伊基斯養傷，中後場人腳唔齊。




史浩克自史堤芬斯重掌帥印後，無論戰績同士氣都大躍進，近16場正式比賽已經贏咗12場，聯賽殺上三甲，歐霸盃亦早早出線，周中作客以色列起用大批副選，結果照樣大炒海法馬卡比。


亨特拉爾着晒火


史堤芬斯亦擅於團結球隊，星級老將魯爾已打消離隊念頭，計劃喺史浩克終老，射手亨特拉爾更全面爆發，近10場聯賽共入10球，雖然聯賽至今入14球唔夠拜仁馬里奧高美斯多，但計埋各項賽事共入25球卻係德甲最勁射手，今仗除秘魯翼鋒法芬養傷外傷疲盡起，加上近9仗主場對不來梅取得6勝2和1負佳績支持，有望再贏一仗。