美斯恨捧盃巴塞大屠「薩」

猪拉多纳

14/12/2011
文： 查理阿蛋

卡塔爾球隊艾薩德上仗險勝艾斯柏蘭斯，周四晚嘅世冠盃4強戰與歐聯盟主巴塞爭奪決賽席位，艾薩德雖然質素次一班，但勝在鍾意鬥攻，域陀華迪斯又唔係咁穩陣，一個唔覺意隨時有斬獲！就算入球大細中位數開到3.5球，都不妨捧1.59倍大！（開賽時間：周四晚6:30）


世冠盃未必係最矚目嘅大賽，但巴塞又點會放過任何一個捧盃機會？巴塞一班星級戰將悉數征日，加上佢哋下場本土賽事只係喺22日嘅西班牙盃鬥賀斯比圖勒，相信哥迪奧拿會派出一眾正選落場搏殺，銳意捧盃揚威全世界。


美斯喺國家打吡受皇馬球員嚴密看管，仍然可以扭過多名敵軍交出絕妙助攻，完全彰顯球王風範！美斯早前就講明：「世冠盃係好重要嘅賽事，每場比賽我哋都有責任去贏！」憑呢份鬥心，已經可以預示美斯會喺世冠盃大放異彩，何況巴塞啱啱擊敗死敵皇馬，士氣如虹，艾薩德又點會有運行？

艾薩德唔夠班輸少當贏

其實艾薩德可以殺入4強，對班波嚟講已經係喜出望外，可以同巴塞踢番場波更加被教練科沙迪形容為「夢一般」，仲坦言：「巴塞係當今最好嘅球隊，呢場賽事將會係班球員喺職業生涯入面最難打嘅一仗！」雖然艾薩德冇乜勝算，不過難得可以同「地上最強」一拚，球員應會好好享受比賽過程，齊齊搞「大」呢場騷！