曼城有錢大晒

猪拉多纳

07/12/2011
文： 樂比堅料

曼市雙雄周四凌晨歐聯上演生死戰！曼聯雙箭頭查維亞靴南迪斯及朗尼一個傷一個缺態，作客瑞士巴素利要忍辱偷生守住先，望保住不敗出線；曼城更已失去出線主導權，即使主場贏拜仁慕尼黑亦未必可以晉級，只能望天打卦等奇迹出現。


歐聯A組曼城主場對拜仁慕尼黑，曼城今仗必須贏波，再寄望同組拿玻里失分先有機會打入十六強，但拜仁絕非善男信女，高層路明尼加賽前揚言要打倒「拜金足球」，即使篤定首名出線亦唔會放水，兩隊攻力強勁，樂比仔建議捧大盤！（有線64及204台周四凌晨3時45分直播）


曼城上輪分組賽不敵拿玻里一比二，目前落後第二位拿玻里一分，今場和波都唔掂，出線形勢被動，不過曼城今季投資咁大，絕唔會放過一絲希望，佢哋首要條件就係擊敗拜仁，戰意唔使懷疑，預期曼城一開波就會主動搶攻，隨時同拜仁合演入球騷。

拜仁鬥攻誓打擊拜金足球

事實上，曼城今季主場威力相當強，計晒聯賽及盃賽，今季主場十仗合共取得九勝一和佳績，當中射入二十九球，前鋒阿古路、迪斯高近期都弗到漏油，腳風相當順。


另一邊廂，拜仁雖已肯定首名出線，但德甲球隊向來甚少揸流攤，即使大戰前後都會派強陣出戰，兼且佢哋班高層一向唔妥「拜金足球」，經常揶揄亂使錢嘅豪門，相信拜仁今場唔會留手。雖然湯馬士梅拿感冒未必可上陣，「小豬」舒韋恩史迪加繼續養傷，但主將列貝利、洛賓及馬里奧高美斯近期都相當弗，以佢哋咁強勁攻擊力，要射破曼城唔難，捧大盤啱數。