拜仁煲不來梅魚生粥

猪拉多纳

03/12/2011
文： 蘇斯黑柴

今晚德甲連場好戲，直播賽事拜仁慕尼黑主場大戰雲達不來梅，雖然不來梅近季跌Watt，令呢場國家打吡褪色為南北打吡，但今季不來梅明顯回升，加上過去作客拜仁表現例醒神，今場唔會任人魚肉，拜仁兩連敗後主場抱必勝決心，但中場缺員太嚴重，黑柴相信拜仁今仗小勝機會較高，推介有3.9倍嘅「讓球和」。




（有線61及64台周六晚10時30分直播）


卻奧斯軒歷基斯中流感


拜仁連輸兩仗後，聯賽榜已跌落第三位置，全隊上下對今仗主場賽事志在必得，洛賓回復健康將復任正選，同列貝利重組一雙魔翼係利好消息，不過中場線卻嚴重缺員，除舒韋恩史迪加養傷，泰摩斯卓克繼續停賽外，大勇嘅卻奧斯同教練軒歷基斯亦雙雙患上重流感，前者上陣機會唔樂觀，後者將過去幾課嘅備戰工作交晒畀助手謝蘭執行，今仗好大機會要將左後衞拿姆推上唔太擅長嘅防守中場，雖然球隊主場出擊戰意十足，整體實力在不來梅之上，但要大勝對手絕不容易。


不來梅作客安聯醒神


不來梅今季表現同成績都有起色，目前只落後拜仁兩分排第四，雖然今仗有門將韋爾斯奔父喪缺陣，但副選嘅美亞列斯已經累積一定大賽經驗，表現令人放心，而且兩員大將比沙路同富斯都趕及傷愈搏殺，佢哋近五季作客安聯球場聯賽一勝四和嘅不敗佳績，今仗亦有足夠決心同拜仁一拚，黑柴相信主隊贏面始終較大，但大勝機會唔高，小敲好分頭嘅「讓球和」啱數。