沙士菲細成騎虎

猪拉多纳

29/11/2011
文： Mic少

南美球會盃四強次回合，阿根廷球隊沙士菲返回主場對厄瓜多爾球隊利加大學，上次都講過「利大」全靠高原主場搵食，首回合果然贏二比○，今仗冇咗地利優勢，勢必死守博晉級。沙士菲攻力麻麻，想收復失地唔容易，捧入球細。




（有線61及201台周三早上8時15分直播）


沙士菲唔擅攻


利加大學策略好簡單，利用高原主場盡數對手，作客明知唔夠踢，就屯重兵後防力求唔畀對手反超前。所以由第一圈開始，「利大」四場作客僅得一勝一和二負，全部開細，當中三場總入球都係「1」球。最有參考價值係十六強對另一支阿根廷球隊獨立隊，「利大」首回合贏二比○，次回合輸○比一，今次鬥阿根廷球隊沙士菲，隨時歷史重演。




沙士菲今仗冇得揀，必然全力搶攻，但「利大」有心用龜縮戰術，沙士菲要入波肯定困難。尤其係沙士菲本身並非擅攻球隊，有唔少主場賽事都係一兩球上落。沙士菲或者可以喺主場球迷面前贏番場，但估計最多只能小勝，入球細最穩陣。如果兩回合總比數打和，以作客入球較多一方為勝，若作客入球數字相同，則立即互射十二碼分勝負。