紐卡素謝晒曼聯「讓主」抵玩

猪拉多纳

26/11/2011
文： 阿占

英超今季居然出現「七雄競逐」嘅混亂場面，當中最驚喜嘅非紐卡素莫屬！之不過，「喜鵲」上輪被曼城打破不敗身後，好大機會好似西甲嘅利雲特咁，道氣一被打斷即打回原形，今晚作客班霸曼聯，小弟認為佢哋都好難避得開連敗厄運，一於撐紅魔1.83倍「讓主」。（有線200及300、廣東體育周六晚11:00直播）




紐卡素開季表現標青，至於有冇資格做真正Big4，由上星期開始嘅「地獄賽程」就係真正考驗嘞！不過頭關對住曼城完全唔夠砌輸1:3，當中守將賴恩泰萊畀曼城班攻擊球員玩到大出洋相，真係慘情，跟手「喜鵲」又要對住曼聯同車路士，睇怕班後防有排震！


朗尼 維迪復出


今季「喜鵲」陣容入面，小弟最欣賞嘅門將告魯爾同前鋒丹巴巴亞，近期狀態亦有下滑趨勢，丹巴巴亞賽前更公開承認：「以班波依家嘅人腳，好難保得住前4！」雖然今場有中場奧巴坦傷愈復出倒戈，但紐卡素連番風光過後，依家似係回緊塘，今場好大危機囉！




另邊廂嘅曼聯近期表現都唔算太好，聯賽連續3場煲魚生粥，歐聯慘遭賓菲加逼和，但又唔可以唔服「紅魔鬼」喎，就算佢哋班人狀態幾一般，照樣都搵到贏波方法。有人批評佢哋近3場聯賽，場場都係贏1:0毫無說服力，不過贏就係贏，何況曼聯今場仲有朗尼傷愈同尼曼查維迪停賽復出掛帥，前後場齊晒腳，呢3分好樂觀！




頂占筍盤：曼聯　讓球主勝




有線球彩台主持阿占

電郵：soccer64@cabletv.com.hk

PHONE波熱線：1831 678

「超級星期六」開放時間：周六晚10:00至周日凌晨3:30