熱刺發維做三哥

猪拉多纳

23/11/2011

【本報綜合報道】前晚英超熱刺憑艾迪巴約梅開二度，主場以二比○擊敗阿士東維拉，不但聯賽四連勝，更升上聯賽第三位，慶祝領隊夏利列納施手術後首度復出領軍。但死敵阿仙奴中場韋舒亞卻唔抵得熱刺咁威，同熱刺球迷輸賭，話如果熱刺今季排名高過阿仙奴嘅話，就捐出三千鎊做慈善！


近況大勇嘅熱刺，今仗有荷蘭球星雲達華治傷愈復出，佢喺早前嘅國際熱身賽受傷，但趕及喺今仗上陣。不過今場主角係艾迪巴約，佢喺上半場已連入兩球，助熱刺奠定勝局，熱刺近九場聯賽贏咗八場，氣勢之強直逼曼城！


領隊夏利列納於賽後表示：「對我嚟講，贏波就係最佳嘅靈藥，我嘅身體冇感到任何唔妥，我對球隊嘅表現相當滿意，今季聯賽唔係曼城同曼聯嘅天下，我覺得熱刺有能力挑戰冠軍寶座！」

韋舒亞打賭熱刺跑唔贏阿仙奴

不過，阿仙奴中場韋舒亞就唔係咁睇，佢同一位熱刺球迷輸賭，話如果阿仙奴今季排名低過熱刺，就會捐三千鎊畀慈善團體。阿仙奴目前落後熱刺三分仲踢多一場，睇嚟韋舒亞要儲定錢至得喇！