南韓U23捱細界

猪拉多纳

23/11/2011
文： 蘇豪

2012年倫敦奧運外圍賽亞洲區A組次輪賽事展開，名牌球隊南韓U23首仗輕取阿曼U23後，今場強勢作客卡塔爾U23，但中場主將金甫炅剛傷愈未有入選，令大軍進攻火力減弱，今場捧入球細最好！（now 671周四凌晨零時直播）


南韓奧運隊主要由國內球員組成，當中以中場尹比加林名氣較大，呢位FC慶南球星年僅廿一歲，上年已經入選大國腳，被視為國家隊未來中場重心，前途一片光明。尹比加林於奧運外圍賽首戰對阿曼取得士哥成為贏波功臣之一，早已證明級數。

金甫炅受傷冇入選

不過，南韓贏阿曼另一功臣金甫炅今次未有入選，呢位大阪櫻花進攻主力同屬新進國腳，此子踢法刁鑽侵略性高，屬奧運隊必然正選，盛傳被唔少歐洲球會睇中。不過，金甫炅早前受傷休戰一段時間，今次未有入選，難免令大軍鋒力減弱。


根據今次奧運外圍賽賽制，小組首名可以直接出線決賽周，南韓同組對手唔算強，但為免大意出事，作客肯定會小心翼翼，以不敗為目標。另一邊廂卡塔爾首戰作客賽和沙特阿拉伯，攻守水平唔差，主場出戰實會力抗韓軍，有機會減少失球，博細盤最好。