聯賽輸波一肚火拜仁炸沉死火潛艇

猪拉多纳

22/11/2011
文： 安高

歐聯死亡A組排榜首嘅德甲班霸拜仁慕尼黑，為咗確保首名出線，今晚喺主場對住已經肯定出局無心戀戰嘅維拉利爾，相信唔難大勝一場。特別係拜仁啱啱喺聯賽輸波谷埋一肚火，今鋪自然會搵呢架死火潛水艇祭旗，安高熱捧1.35倍「讓球主勝」！（有線62及202周三凌晨3:45直播）


維拉利爾4戰入得1粒


目前以4戰得10分排A組榜首嘅拜仁，贏埋今場的話，首名出線機會極高。事實上，佢哋近期狀態相當唔錯，近5戰就得4勝1負，雖然响上周末場德甲大戰輸咗畀爭標勁敵多蒙特，但查實場波個主動權一直喺佢哋手，控球比率超過6成幾，贏勢輸波屬非戰之罪。陣容方面，快翼洛賓上場已經傷愈，熱身過後會有更佳演出，「小豬」舒韋恩史迪加因傷續抖，但都有卻奧斯頂上。至於防線就算話有畢斯杜巴停賽，只係維拉利爾嚟唔嚟到心臟地帶都難講啦！




「黃色潛艇」今季表現真係潛晒水，喺西甲一直只能位列中游，歐聯小組賽至今4戰4敗出線無望，最恐怖係喺箭頭基奧斯比羅斯長抖，加埋巴西兵尼爾馬近排入埋十字軍後，4戰只入1球，就連想話爭番個小組第3轉戰歐霸盃都一樣有心無力，自然唔慌有鬥志啦！