賓菲加做曼聯細界

猪拉多纳

22/11/2011
文： 麥馬拿仁

歐聯C組重頭戲，「葡超紅魔」賓菲加作客唔赦「英超紅魔」曼聯。自被曼城大炒後，曼聯霸氣盡斂，領隊費格遜又視歐聯分組賽為練兵場所，今場未必夫添，加上朗尼改踢中場，難言穩勝。客軍狀態托弗，本季各項賽事廿仗不敗，捧「讓球客勝」同細盤！（有線61及201台周三凌晨3時45分直播）




曼聯季初氣勢如虹，但十月尾主場被曼城炒六個一皮後，雖然接連五連勝，但對愛華頓、新特蘭、史雲斯都贏得一粒，毫無霸氣可言。事實上，艾舒利楊格近期受傷影響甚大，折翼曼聯威力大減，加上朗尼上陣成疑，球隊靠「小豌豆」查維亞靴南迪斯支撐大局，其他主力如韋碧克、路爾斯華倫西亞同拿尼，鋒芒亦大為收斂。另外尼曼查維迪停賽，莊尼伊雲斯分分鐘又做計時炸彈。




另外，費Sir對待歐聯思路亦有迹可尋，本季分組賽佢多番收起主力應戰，其中作客賓菲加以二線兵敷衍，最終只能辛苦地逼和對手一比一，上仗鬥加拉治更出奧雲同貝碧托夫攻堅。現時曼聯與賓菲加於小組同得八分，領先巴素利三分，之後兩支勁旅仲有一場在手，故今戰就算和波，對曼聯亦非世界末日，故曼聯或會繼續收起部分主力。


賓菲加20戰未嘗一敗


賓菲加名氣雖遠遜曼聯，但四平八穩絕對係豬頭骨，而且球隊大熟大勇，本季葡超、歐聯及葡盃夾夾埋埋踢咗廿仗，錄得十三勝七和佳績。呢班波好有紀律，防守滴水不漏，隊長安達臣雷沙奧好有卡士；而鋒線奧斯卡卡度素、艾馬都係好波之人，預料賓軍今仗可保不敗。曼聯唔弗好難咬得入客軍，賓菲加可於歐聯分組賽連續五場開出細盤。