車輪戰考起曼城

猪拉多纳

22/11/2011
文： Wendy

曼城今季嘅勇態的確令大家對佢改觀，喺英超領先緊曼聯五分，冠軍賠率以佢最熱。不過踢歐聯又唔同講法，唔係買幾個大球星返嚟，用一、兩年時間就可以稱霸歐洲，歐洲賽經驗真係好緊要。我硬係覺得，曼城即使入到歐聯十六強，最多八強就會止步，當然仲要視乎遇着咩對手啦。




唔講咁遠，「英超一哥」要出線十六強，今晚先要過到拿玻里至得，因為對手為晉級亦都會同你死過。亞洲盤開曼城讓半球，飛數上極睇好曼城，我就反而覺得要拿玻里主場受讓可以一敲。




曼城依家以七分排A組第二，比排第三嘅拿玻里多兩分，維拉利爾○分包尾，曼城只要一贏，就肯定入十六強。當然，曼城上下都想盡早K.O.對手，但上次碰頭佢哋喺主場都只係以一比一逼和拿玻里，咁今晚作客就更加要打個折啦。


撼完紅軍再鬥阿仙奴


睇番曼城之前作客拜仁，形勢上似係壓住對方，但最終就吞咗兩蛋，呢個同缺乏歐洲賽經驗有關，所以飛數讓到咁狠我都唔信。曼城踢完呢場就要作客回勇嘅利物浦，之後喺聯賽盃又硬碰阿仙奴，個賽程都幾惡啃(o架)，肯定文仙尼會輪流派球員上場。