紅軍煞車格食格

猪拉多纳

20/11/2011
文： 樂比堅尼

香港時間周一凌晨上演「紅藍大戰」，由藍戰士車路士主場迎戰紅軍利物浦。車仔多年來天不怕地不怕，唯獨最忌紅軍，無論於聯賽或歐聯，即使車路士最強大時候，對親利物浦都老鼠拉龜，更何況現在變成落水狗？車仔今場讓唔起半一，樂比仔捧利物浦下盤。




（有線200及300台周一凌晨零時直播）




自阿布拉莫域入主以來，車路士最驚嘅球隊唔係巴塞隆拿或曼聯，而係利物浦，因為車仔無論邊個領隊執教，對住利物浦都係無從入手，車路士近六次主場對利物浦，法定時間僅贏過一次。


穩守突擊剋爆車仔


如果你問點解，樂比仔只能夠話係格食格，一來紅軍踢法擅長穩守突擊，球員鬥志旺盛，防守紀律好，話唔出就唔出，對住強隊往往分外醒神，從今季作客贏阿仙奴、主場和曼聯就可見一斑；其次車仔亦唔擅長強攻對手，對住紅軍密集防線無計可施，上季兩次交手都落敗，今季實力冇乜增強下，相信難有突破性演出！




事實上，車仔今季演出相當唔穩定，之前連續四場法定時間不勝，表現已叫人失望，連一向穩健嘅防守都崩潰，對住阿仙奴都可以失五粒，樂比仔實在睇唔出車仔有何乜能奈贏紅軍，所以利物浦受讓半一，從盤口上可謂相當值博。




更何況車仔前鋒費蘭度托利斯已經畀班前隊友睇通晒條路，上季首披車仔戰衣，對利物浦被完全凍結，而另一殺手杜奧巴不復當年勇，據報亦有傷在身，以紅軍一貫對強隊咁勇悍，相信今仗可延續呢個特性，除非車仔已唔算係強隊啦！