高路斯歸隊德國食橙

猪拉多纳

13/11/2011
文： 力奇

嚟緊周中繼續係國際賽擔大旗，昨晨作客以3:3逼和烏克蘭嘅德國，後晚返主場同荷蘭拍跳，會有老牌射手高路斯歸隊，慕遜加柏中場馬高列奧斯亦病愈復出，呢個黑仔對上7次入伍，有5次因傷病退隊，今次難得落到場為國爭光，肯定搏老命啦！




德國昨晨出場陣容平均只得23歲，唔知係咪凍到傻咗，竟然一度落後烏克蘭1:3，結果只係憑住路菲斯同湯馬士梅拿各入1球，驚險逼和主隊。賽後領隊勒夫就話嚟緊對荷蘭場波，點都會踢番好啲，加上箭頭高路斯歸隊，火力可信。


荷蘭缺少尹佩斯 雲達華治


事實上，德國聽晚鬥荷蘭，至少會有馬高列奧斯呢位22歲新星復出，佢今季喺德甲上陣12場就轟入7球，只可惜佢上周因為感冒引發胃痛，無奈缺席對烏克蘭之戰，今次佢終於病愈，加埋前鋒高路斯都或可趕及歸隊，撞正昨仗悶和瑞士兼有主將雲達華治及尹佩斯缺陣嘅「橙軍」，似乎真係有計喎！