超班聖日耳門明恰施洛雲

猪拉多纳

03/11/2011
文： 力奇

法甲富豪軍團巴黎聖日耳門，今晚喺歐霸盃F組主場出戰斯洛伐克球隊施洛雲，質素加地利係佢哋穩贏武器，加上佢哋目前爭出線形勢仲未穩陣，唔搏唔得，1.5倍「讓球主勝」應該好穩陣啦！（有線63及203周五凌晨2:00直播）


施洛雲作客冇料到


聖日耳門依家與薩爾斯堡同得4分，僅以較佳對賽成績位列小組第2，落後得7分嘅畢爾包，今仗有乜閃失，爭盃嘅希望隨時幻滅，話晒今季重本擴軍，揚威歐洲自然係佢哋最大目標。上輪佢哋作客悶和施洛雲不足為據，事關當日下半場中段開始就打少個，到最後更加得9人應戰，但始終質素秤先，依然係形勢佔優一方。今仗變番11個打11個，再加個主場之利，就算話中場查杜美同後衞迪爾尼停賽，都一樣夠殺啦！




施洛雲依家喺斯洛伐克超聯都只係排第4，狀態唔算出色。球隊欠缺星級球員，爭勝靠嘅係團體戰同地利，睇番佢哋之前3場分組賽，主場僅負畢爾包同逼和聖日耳門算有交代，但作客薩爾斯堡就大敗0:3，質素所限，去到巴黎想輸少球都難啦！




歐霸盃賽制：48隊分成12組，每組4隊進行主客雙循環分組賽，每組頭2名出線32強淘汰賽。