皇馬着晒火喪砌里昂

猪拉多纳

02/11/2011
文： 走肖

首循環淨吞4蛋，里昂今晚喺歐聯D組主場再對皇馬，心態上當然唔想再輸，弊在一對左路球員米高巴斯圖斯同阿里施蘇高連環打柴，何況皇馬射手賓施馬連續3次倒戈出戰有波入，有佢做無間道主角，1.45倍客W咪嫌熱！（有線62及202周四凌晨3:45直播）

經過3場分組賽，里昂同阿積士同得4分，落後3戰全勝嘅皇馬5分，為爭出線今場非搏不可。可惜上星期里昂有米高巴斯圖斯受傷要抖成個月，跟住聯賽對聖伊天又有阿里施蘇高傷出，射手利辛度盧比斯同中堅文沙又未好番，呢鋪再遇「銀河艦隊」隨時輸到渣都冇得剩。


里昂左路雙子缺陣


相反，連贏8場嘅皇馬近排有射手賓施馬同希古恩輪流着火，而且對上3次喺歐聯對賽，賓施馬倒戈出戰例必有斬獲，證明佢睇通晒里昂防線漏洞。仲有呀，雖然卡卡同艾比路亞或者倦勤，不過日前皇馬以1:0砌低皇家蘇斯達場波，正選出戰冇料到嘅奧斯爾，今場一定發力證明身價，確保前線有足夠供應，肯定攻到里昂有氣無碇抖。


唔可以唔提嘅係，皇馬王牌C朗仲未攻入加盟後個人第100個入球，大家知啦，C朗份人最愛面子，依家連續兩場冇入球、冇助攻，肯定唔高興，而且佢日前同皇蘇球迷嘈大交，谷埋成肚火，落場肯定見邊個過邊個，有佢同好拍檔迪馬利亞輪流喺邊線爆破，試問有左路雙子缺陣嘅里昂點頂得住？