曼城南下勾魂

猪拉多纳

02/11/2011
文： 樂比堅尼

今晚繼續上演歐聯生死戰，A組「死亡筆記」大有機會寫上維拉利爾名字，事關呢支積弱西甲兵今晚主場對曼城，對手近期鴻運當頭，六連勝着晒火，「黃色潛艇」則黑過墨斗，球員輪住受傷，戰績亦潛晒水，曼城今仗實行撳住搶三分，捧客W之餘，不妨捧埋大盤。




（有線61及201台周四凌晨3時45分直播）




A組最惡打，目前拜仁七分，拿玻里、曼城分別五及四分，維拉利爾○分，今場再輸就出局。由於歐聯出線機會渺茫，甚至爭歐霸席位亦相當困難，相信「黃色潛艇」會將集中力放番喺聯賽，以免兩頭唔到岸，搞到降班收場，今仗即使有主場之利，都唔敢逞強。


潛艇冇羅斯惡唔出


維拉利爾戰績差嘅其中一個原因，就係傷兵情況非常嚴重，主將基奧斯比羅斯重創要抖六個月，巴西前鋒尼爾馬亦有排都唔出得，最慘係馬高魯賓、卡尼及卡梅拿斯等攻擊球員先後受傷，唔好話攻力大減，甚至排個較完整陣容都有困難，最近有消息指教練加列度聞到魷魚香，隨時畀人落鑊，令軍心大受影響。




反觀曼城實在太弗，六連勝不特止，總共射入廿四球，平均每場入四粒，迪斯高、巴洛迪利、阿古路、大衞施華及拿斯尼全部弗到漏，就算出邊個都有入球保證，由於曼城三戰僅得四分，喺分組賽落後拜仁慕尼黑同拿玻里，若今仗稍有差池嘅話，隨時有機會出唔到線，故今仗肯定搏老命，除捧客勝外，相信入波亦會多，捧埋大盤啱數。