莫迪搶Ｗ奪冠賀百年會慶

猪拉多纳

30/10/2011
文： 渡邊年

今日唔同大家講食經，講吓人，主角係挪超莫迪主帥蘇斯克查。蘇斯克查絕對係近代最出色嘅挪威球員，曼聯領隊費格遜早幾日同墨西哥「小豌豆」查維亞靴南迪斯續約，都提及蘇斯克查，費Sir話：「對上一個曼聯球員能夠迅速融入球隊，就係蘇斯克查。」


蘇斯克查領軍出色


蘇斯克查1996年至2007年効力曼聯，係協助「紅魔鬼」成為三冠王嘅主要功臣，當時曼聯有「黑雙煞」約基同高爾，同埋「白雙煞」蘇斯克查同舒寧咸，四人當中以蘇斯克查最低調，而且前鋒線上配邊個效果都咁好，難怪費Sir讚佢適應力強。




呢名有「娃娃臉殺手」之稱嘅前挪威國腳，舊年11月開始返回母會莫迪執教，就係憑住蘇斯克查嘅超強適應力，帶咗一季成績就好好，今仗帶領球隊主場對史卓加斯特，只要贏波就可以提早兩輪贏得冠軍。（周一凌晨1時開賽）




呢個冠軍意義非常重大，除咗係蘇斯克查第一個錦標，亦咁啱係莫迪創會一百周年會慶，所以今場啲飛一早賣晒，會方專賣店亦僅以港幣三蚊低於成本價，賣打氣旗仔畀fans入場造勢，球員必落力，對手史卓加斯特無謂亦冇力阻人贏波慶祝。