拜仁拆「紐」撐1.41倍「W」

猪拉多纳

29/10/2011
文： 朱楓

拜仁慕尼黑今晚會喺德甲進行巴伐利亞州打吡第二部曲，喺主場迎戰紐倫堡。睇拜仁喺周中德國盃成功反彈，信心返晒嚟，今場對住傷兵滿營嘅紐倫堡，應該唔難乘勝追擊再開1.41倍「讓球主勝」益大家！（有線61及64周六晚9:30直播）


紐倫堡8主力唔踢得


早排大勇嘅拜仁，近況有些少回落，上周德甲作客更不敵漢諾威，本來朱楓都幾擔心佢哋之後連對恩高斯達特、紐倫堡同奧格斯堡三支巴伐利亞州死敵會有暗湧，好在睇拜仁日前喺首部曲德國盃主場送恩高斯達特半打光蛋，似乎已經搵番晒信心，今場就算有後衞謝路美保定開始停賽2場兼要備戰歐聯，都阻唔到佢哋全取3分嘅決心。




對家紐倫堡啱啱喺德國盃作客以2:1擊敗奧厄過關，但其實佢哋喺德甲已5場不勝，計埋啱啱場德國盃更加連續7場有失波。紐倫堡今季後防咁曳，最大原因在於一直受傷兵困擾，單係今晚作客拜仁，就有前鋒艾格拿、後衞柏尼爾遜、賓路拿、門將拉高夫斯基同舒希化等8位主力唔出得，唔輸個「主其他」已經要偷笑咯！