華倫訪薩拉戈薩敲和波

猪拉多纳

26/10/2011
文： 查理阿蛋

華倫西亞今晚作客薩拉戈薩，雖然「蝙蝠軍團」名氣大，但佢哋將主力逐個賣走，啞火之餘更有主將簡拿利斯長抖，剩低嘅陣容又點夠力應付兩條戰線？小妹唔睇好呢隻折翼蝙蝠可以喺硬淨嘅薩拉戈薩地頭發威，寧博3.25倍和波。（now632及660台周四凌晨2:00直播）


華倫現疲態7戰得1勝


有唔少朋友都話巴塞同皇馬係屬於另一個聯賽「西超」，其餘陪跑分子先係西甲球隊！呢18隊入面，華倫一直係領頭羊，可惜佢哋經濟唔掂，韋拿、大衞施華同桑馬達等相繼被賣走，同時應付西甲同歐聯令「蝙蝠軍團」現晒形，近7戰只曾1勝，更連續5場只入1球，火力疲弱。雪上加霜嘅係，今季表現出色嘅皇馬借將簡拿利斯因十字韌帶撕裂要抖半年，皇馬仲專程派軍醫為佢檢查傷勢，可見簡拿利斯幾咁重要。




對家薩拉戈薩近況唔算好，3場不敗後，上仗作客又淨吞奧沙辛拿3蛋。不過佢哋近3次主場出擊保持不敗，表現夠晒硬淨，今仗面對啞火嘅華倫西亞，有力搏個和局收場。