皇馬上齊架生 轟沉潛艇 ！

猪拉多纳

26/10/2011
文： 力奇

今晚西甲尾場，隨時見證歷史！皇馬主場迎戰「黃色潛艇」維拉利爾，力奇睇好皇馬可以大勝。事關近戰弗到爆嘅C朗只要喺今場波入多2球，個人喺「銀河艦隊」嘅總入球數就達到100球大關，為咗個人名譽兼為球隊，今仗梗係開火喪轟走晒樣嘅潛艇啦，讓2球照捧1.92倍「讓球主勝」！（now632及660台周四凌晨4:00直播）




皇馬近排真係Fit到漏油，6連勝之餘，呢6場波嘅總得失球係25對3，最少嗰場波都入3粒，所以今鋪即使讓2球都好，又有乜好驚吖？佢哋陣中2大射手C朗同希古恩腳風順到爆，近4場聯賽分別上演2次帽子戲法，當中C朗個人喺皇馬累積入咗98球（見附文），只要再入多兩球就達到百球里程碑，以一眾維拉利爾守將嘅質素，又點睇得住狀態弗爆嘅C朗吖！


聖卡被罰勢打爭氣波


再講，皇馬陣中人才濟濟，就算話佢哋有卡維奴同紐尼沙軒養傷，中後場都有足夠替補。咪忘記今季全面回勇嘅卡卡、德國全能中場奧斯爾等狀態都係着晒火，加上賓施馬做後備殺手，要入波真係易過借火。鋒力夠猛，防守力亦一樣畀到人信心，話說門將卡斯拿斯周一練波嗰陣塞車遲到，搞到畀主帥莫連奴罰錢，堂堂隊長畀人省到一面屁，今鋪肯定想大打爭氣波，希望保住「聖卡」個朵啦！


維拉利爾對賽輸到慣


維拉利爾今季似足佢哋外號，狀態真係潛晒水。家陣排喺聯賽榜第16位，8戰先贏得1場，如果計埋歐聯，更加係13戰贏得2場添。力奇睇過往績，佢哋歷來喺西甲作客巴拿貝球場12次，只得3和9負成績，次次作客皇馬都係衰住走，最慘係佢哋前線仲有巴西前鋒尼爾馬長抖，要靠基奧斯比羅斯獨力支撐，想偷雞都冇本錢。