阿仙奴星級後備恰保頓

猪拉多纳

25/10/2011
文： 安高

3日踢2場梗係唔易捱啦！不過阿仙奴有唔少籌碼輪換，應付今晚主場對保頓嘅聯賽盃16強大戰。朴主永等高質新兵今仗都會披甲，捧2.3倍「讓球主勝」！（開賽時間：周三凌晨2:45）




兵工廠經過一輪增兵後企穩陣腳，近排狀態逐漸回升，近8戰取得7勝，球員信心的確返晒嚟。當然，為咗應付3日第2戰，加上雲格對聯賽盃安排嘅慣例，星級主力尹佩斯、謝雲奴同桑治等都唔會披甲，不過補上嘅係實力相當嘅南韓射手朴主永、英格蘭超新星張伯倫同以色列國腳中場班拿約等，其中前兩者上一圈聯賽盃都有入波，中堅史基拿斯又話傷愈，力奇信「小兵」一樣可以輕鬆過關。


保頓出二線兵留力護級


保頓呢邊，今季表現令人失望，依家喺英超排尾3，都咪話唔得人驚。連埋上周末聯賽淨吞新特蘭2蛋，保頓近10戰輸7場，就連英格蘭國腳守將加利卡希爾都承認班隊友冇晒信心，根本踢唔到好波。




領隊奧雲高尼為咗保留實力護級，據聞今仗會收起正選門將積斯基連倫，改由匈牙利嘅阿當保丹把關，呢位24歲門將上次披甲鍊車仔失咗5球，手騰腳震；中場重心李奧曲卡亦會先退居後備，前線又話會起用新仔卡古達，弱陣出戰，又點頂得住志切爭盃嘅兵工廠呢？


英聯盃賽制：


今輪為16強，一場過分勝負。若法定時間打成平手，將加時30分鐘決勝，再和則互射12碼。