熱刺讓唔起魯賓卡山

猪拉多纳

20/10/2011
文： 亨格比利

話就話係歐洲戰場第2大盃賽，但唔少人都覺得歐霸盃係雞肋，獎金唔多、賽事又頻繁，真係盞搞！熱刺主帥夏利列納都係咁諗，難怪由附加賽至今都只係派散仔出戰，加上後防大鬧兵荒，今晚就算有地利都讓唔起魯賓卡山，呢場歐霸盃A組賽事一於捧2.15倍「讓客」。




（有線61及201周五凌晨3:05直播）




連埋附加賽同A組頭兩輪分組賽，夏利叔都係派散仔出擊，先後淘汰赫斯同大勝沙姆洛克流浪，預計佢老人家會繼續收起莫迪歷、加里夫巴利、柏加同艾迪巴約等主力，改派積基李華摩亞、丹尼路斯同湯卡路爾落場。呢班生牯仔係有潛質，但魯賓卡山嘅歐洲賽經驗咁豐富，夏利叔嘅如意算盤未必再打得響。


京治傷鼠蹊抖1個月


況且熱刺後防鬧緊兵荒，隊長京治上仗對紐卡素傷出，經軍醫證實係鼠蹊傷要抖1個月，加拿斯、戴臣、辛度雲尼亞里3位中後場球員亦養緊傷，加上門將費度冇註冊，條防線咁流確係有隱憂。


客軍射手馬田斯復出


喺A組同熱刺一樣1勝1和揸住4分嘅魯賓卡山，近兩場俄超都贏晒，教練比迪耶夫上場聯賽提早調走右翼卡拉丹尼斯同前鋒華迪斯，但最終都照炒莫斯科斯巴達3蛋，證明狀態唔曳。賽前比迪耶夫收到好消息，就係尼日利亞射手馬田斯傷愈，呢位左腳仔喺英超打滾多年，熟晒熱刺路，趁住對手防線穿大窿仲唔係佢嘅Show Time？