傷停困擾摩納哥 唔慌攻「細」多

猪拉多纳

17/10/2011
文： 朱楓

前歐聯亞軍摩納哥今季認真濕滯，落到去法乙都係冇乜起色，今晚作客甘岡仲受傷停困擾天殘地缺，不過對手出晒名唔識入波，咁嘅情況，朱楓建議大家呢場買瓣1.5倍入球細好過！




（開賽時間：周二凌晨2:30）




假如足智彩冇開法乙，相信大家都唔知摩納哥今季成績會咁曳。其實呢支前法國勁旅，改由前球員施蒙尼執教後，近況開始有改善，佢領軍4場後幫摩納哥打響今季勝鼓，合共搶得5分，但好衰唔衰隊長古利因小腿受傷，至今仍未復出，今季交出1個入波兼3次助攻嘅中場新星伊沙域今場仲要坐波監，老牌射手希士達又上陣成疑，摩納哥嘅入波能力的確幾令朱楓擔心。


甘岡主場全開細


對家甘岡今場雖佔主場之利，兼有中場迪亞路刑滿，但朱楓賽前問過一位法國行家，佢話甘岡前線把握力超曳，睇番聯賽榜，甘岡打完10場竟然只入得5球，開細比率高達80%，單計主場更加去到100%，睇怕今晚對住唔齊人嘅摩納哥，頂盡都係一球上落。