帕拉尼恩斯平手勝算「高」

猪拉多纳

13/10/2011


正力爭重返榜首嘅華斯高，聽朝喺巴甲作客帕拉尼恩斯，可能有「長勝中堅」缺陣，對住賽前有會長開腔力撐教頭安東尼奧盧比斯嘅帕拉尼恩斯，真係未必攞到分。足智彩今場開讓球有平手盤，朱楓決定支持帕拉尼恩斯，話唔定會有驚喜！（開賽時間：周五早上7:30）




巴甲仲有10輪就煞科，但有爭標機會嘅華斯高近況就有啲回落，繼主場賽和哥連泰斯後，上場作客居然吞國體會3蛋，賽後有巴西數學家話華斯高奪標機會率，已由39%跌至26%。對於失去「一哥」地位，華斯高門將費蘭度拜頓巴達坦言好失望，但仍然有信心最後可以喺巴甲封王。


華斯高「長勝中堅」未必踢


其實華斯高上場輸得咁大鑊，巴西傳媒普遍認為原因係佢哋有中堅達迪安達臣缺陣，有數學家更計出，華斯高近年有達迪上陣勝率高達62.5%，相反缺陣就只得38.8%。由於呢位中堅啱啱先幫巴西披甲作客墨西哥，今場未必會踢，絕對係一大隱憂，加上中場菲臘比巴斯圖斯上場飛剷國體會中場迪阿歷辛度，面臨秋後算帳被重罰停賽4至12場，今場可能突然要坐波監，你話仲點捧得落？




身陷降班漩渦嘅帕拉尼恩斯，上場作客大敗畀艾華爾0:3，護級更加水深火熱。雖然帕拉尼恩斯今場有中堅文奴爾美斯亞斯停賽，前曼聯中場基巴臣又因膊頭重傷證實要做手術抖3個月，但好消息係厄瓜多爾國腳中場祖菲古朗已歸隊，後衞馬些路奧利華拉亦有望傷愈復出，加上會長馬路斯尼賽前走出嚟振奮軍心，大讚教練安東尼奧盧比斯有料到，落「柯打」命令班波今場一定要取得救命3分，今場平手盤應該坐走望贏。