馮瀟霆傷愈 撐國足

猪拉多纳

11/10/2011
文： Wendy

成日都有人話，中國人唔夠團結，所以個人項目好似體操呀、跳水等奧運、世界賽，就攞獎攞到手軟，但足球呢，就畀球迷噓到失聲。




原來近排係中國出線「2002世界盃」十周年，小妹當年都好細個咋！其實都幾醜怪，「出線」世界盃都要紀念，咁日本、南韓嘅球迷咪好唔得閒？我都唔想柴祖國台o架，只不過恨鐵不成鋼嘛！無論點，今晚都支持國足搞掂伊拉克啦！




國足早已到咗深圳，早幾日仲熱身賽狂攻阿聯酋，逼到對手半場連一個射門都冇，真係講都唔信！雖然依家大家最熟悉嘅新一代國腳蒿俊閔就因傷缺陣，但幾位大哥鄭智、李瑋鋒同杜威等全部入選，就算佢哋冇上陣，都可以穩定軍心，成班波自然踢得醒定啲。




對教頭甘馬曹嚟講，最好嘅消息就係馮瀟霆傷愈，呢個中路守將頭頂腳踢皆能，又有成一米九咁高，上年去過南韓踢全北現代，有佢守住個後防，可信好多。


甘馬曹要贏波減壓


伊拉克咁遠飛到嚟，未開波已經先搞小動作，批評中國無畫定波飛畀伊拉克球迷喎！大大話話，中東去中國講緊要搭成七、八個鐘頭飛機，真係有咁多伊拉克球迷隨隊打氣？真係搵嚟講。雖然伊拉克教頭係薛高，名氣當然勁，但早前先傳佢同足總嘈過，班球員係咪咁聽佢支笛，就真係冇人知。




至於中國教頭甘馬曹，雖然話上任無耐，但佢亦都有壓力，如果佢帶唔到國家隊去十強賽，都好難向班領導交代。所以今晚無可能唔利用深圳呢個地利，爭取贏波啩！

Wendy推介：中國勝