安治簽迪奧夫盞攞嚟衰

猪拉多纳

09/10/2011
文： 麥馬拿仁

俄超安治話要簽晒C朗、尼馬、林伯、謝四，仲話要簽埋莫連奴，拿仁認為未必冇可能，但就好難咯，但上周宣布簽入「冇品之霸」迪奧夫，就真係「奇招」囉，此隊「暴發戶」雖然有米，但都唔使捉隻老鼠入米缸啩？迪奧夫於英超個朵臭到暈，早被封球員、球迷公敵，早前被布力般流浪放棄後，估唔到屈尾十搵到好飯鑊。迪奧夫波、品均曳，拿仁睇死佢踢唔到一季！


「冇品之霸」專搞亂檔


○二世界盃，迪奧夫於揭幕戰為塞內加爾玩死法國，同年球季轉投利物浦，以為就此扶搖直上。但原來迪奧夫把握力奇差，球品又衰到冇朋友，紅軍球迷已出名友善，但都畀佢全面辣o架；三年後踢走瘟神，利物浦粉絲無不拍爛手掌。




迪奧夫私生活唔檢點，之後於保頓、新特蘭同布力般愈踢愈沉，七年間上陣189場英超只入16球。球場代表作欠奉，惡行卻罄竹難書，場內詐跌插水唔在講，場外無牌駕駛、向樸茅球員迪蘇禾吐口水，最賤係恰細路，既向執波仔種族歧視，又對十一歲米堡球迷吐痰，正宗污糟邋遢冇厘貴格。




安治剛炒教練格茲耶夫，但夠膽死搵迪奧夫搞亂檔，眼光咁曳，呢班波難成大器。迪奧夫講過自己「鍾意被痛恨」，去到俄羅斯肯定求仁得仁。連卡路士都被當地粉絲種族歧視，迪奧夫又點會唔「接蕉」？但奉勸球迷一句，呢條友癲得好勻循，隨時又大放飛劍，都係戴定口罩穩陣，點知佢口水有冇毒先得o架！