阿根廷走樣捱細界

猪拉多纳

07/10/2011

2014年世界盃外圍賽南美洲賽事周六凌晨展開，由於主辦國巴西直入決賽周，今次焦點自然落喺「二哥」阿根廷身上，但呢支傳統勁旅近年大賽表現遜色，美斯踢國際賽往往冇料到，實在不宜高估。智利缺少阿歷斯山齊士欠破門本錢，或乾脆死守求和博一分，捧入球細。


（有線61及201台周六早上7時10分直播）


逐個球員秤，阿根廷實力遠勝對手，但湊成一隊比賽，表現卻經常令人失望，特別係美斯為國上陣，水準同踢巴塞時判若兩人，佢已經連續六場國際賽共617分鐘冇波入，雖然話期間美斯多次助攻，幫隊友入波，但要留意阿根廷今次鋒線人腳麻麻，阿古路因傷倦勤，另一位曼城射手泰維斯冇入選，至於皇馬前鋒希古恩雖喺上仗西甲大演帽子戲法，但佢並非皇馬正選，能否保持水準令人懷疑。


另外，阿根廷領隊沙貝拉只係上任咗一個多月，仍需要時間摸索，佢早前帶隊喺羅卡盃兩戰巴西，球隊都入唔到波，更令人質疑其戰術安排。

智利「A山」缺陣火力減

智利最大不利因素，係効力巴塞嘅「智利C朗」阿歷斯山齊士因傷落選，令攻力大打折扣，撇開「A山」之外，智利缺乏進攻人才，反而有唔少工兵型中場，包括祖雲達斯中場維達爾及烏甸尼斯中場伊斯拿，佢哋勝在夠死纏爛打，阿根廷要組織攻勢亦唔易，就算贏都係小勝居多，不如博入球細好過。b:Mic少