艾堡３連敗爭標冇希望

猪拉多纳

21/09/2011
文： ComboKing

瑞典超殺入直路，各路雄師爭標的爭標、護級的護級，戰意分明，好路之選不少。其中艾夫斯堡主場惡鬥希爾星堡，艾隊季尾臨尾香三連敗，要迎頭趕上今仗非勝不可，但希堡作客極度硬淨，全季聯賽僅一敗，睇定嚟食坐和望贏，受讓捧「讓球客勝」！




（周四凌晨1時開賽）




艾堡由季中開始就同希堡於榜前列叮噹馬頭，但經歐霸盃一輪折騰後未能回氣，近期好似食咗瀉藥一般，連輸畀馬模、加爾斯同赫根，以上三隊都係硬嘢，「地獄賽程」最後要鬥埋希堡，好難翻身。目前艾堡差希堡十分，聯賽只剩五輪，今仗唔贏唔得，但以其目前差勁走勢惡唔出樣。希堡無論主場、作客，成績都係聯賽最好一隊，去到季尾仍段段有力，狀態遠勝對手，受讓又點可以唔捧場？


李斯特城夠兵力爭盃


另一戰西里安斯卡主場鬥奧雷布洛，主隊實力本身唔曳，一路戰績低落只因屢受傷停困擾，去到季尾情況紓緩，配合不俗主場威力，可擊敗狀態曳極嘅客軍。最後拖場英聯盃，李斯特城板櫈深度夠，於盃賽收起部分正選都冇有怕，作客上兩圈都和波嘅卡迪夫城，受讓當然要得過。