地上最強派8蛋生晒 巴塞半勝祭蝙蝠

猪拉多纳

21/09/2011
文： 法比加輝

西甲快車矚目大戰，華倫西亞主場迎戰巴塞隆拿。巴塞經過兩場大意和波後，上輪聯賽終於踢出霸氣，大數奧沙辛拿八球，重拾「地上最強」應有水準。其實只要巴塞唔輕敵「打真軍」，世上真係冇乜邊支球隊頂得住佢哋，就算作客面對三連勝嘅華倫，加輝依然會捧巴塞，嫌客勝分頭低嘅話，可取「半場客勝」。




（now 632及660周四凌晨４時直播）




巴塞早前對皇家蘇斯達及ＡＣ米蘭都因輕敵而意外被對手追平失分，賽後除遭傳媒狠批外，教練哥迪奧拿亦表明對戰果不滿，擺明向球員施壓。結果「地上最強」上場立即打番出應有水準，在美斯連中三元下狂炒奧沙辛拿八比○，證明只要巴塞嚟真，的確可以輕輕鬆鬆就大炒對手。


華倫射手受傷缺操


雖然華倫開季後聯賽三連勝，但其實三場賽事唔算難踢，個人認為「蝙蝠兵團」今季仍未遇到真正對手。另一方面，連續三場聯賽都有「士哥」、弗到漏油嘅射手蘇爾達杜上場勇戰受傷，賽前亦缺席操練，今場能否披甲仍屬未知數，若然冇咗呢位靈魂人物，戰鬥力難免大減。巴塞方面則仍有阿歷斯山齊士、恩尼斯達及碧基因傷缺陣。




回勇嘅巴塞根本無人能擋，加輝認為唔好拗頸捧主隊，不過巴塞作客要贏兩球或以上亦有一定風險，所以建議大家捧「半場客勝」，若然會睇直播嘅朋友，亦可等「即場投X」客勝有靚水位先入貨。