阿仙奴辣槍摧花

猪拉多纳

17/09/2011
文： 樂比堅尼

今晚英超頭場累鬥累，布力般流浪主場對阿仙奴，兩隊今季都創下球會英超最差開季成績，但阿仙奴衰極有個譜，起碼聯賽已開齋，歐聯亦保持不敗；至於「英超玫瑰」布力般目前面對嘅並非質素問題，而係深層次矛盾，球員落到場根本唔投入，樂比仔寧願信阿仙奴反彈，捧1.73倍客W！




（有線200及300台周六晚7時45分直播）




阿仙奴上周主場對升班馬史雲斯，僅憑對方門將送大禮，以一比○險勝對手。老實講，樂比仔睇完阿仙奴呢場表現真係非常失望，但正如雲格所講，贏波對重建球隊信心非常重要，醜陋地贏總好過漂亮地輸，惟有寄望阿仙奴班新「槍手」經過磨合後，表現會有所進步。




樂比仔之所以睇好阿仙奴，其實並非信任「兵工廠」，而係對布力般完全冇信心，雖然布力般喺上周逼和富咸，成功取得第一分，但季初踢咗四場真係冇段踢得好，前線棄用大隻佬羅拔斯確實增強咗活力，但靠魯賓洛堅拿、葛維尼攻堅，真係好難做啲乜嘢出嚟，相信阿仙奴今場好快就可控制戰局，入波只係遲早嘅事。


布力般將帥不和


其實樂比仔已多次提及，布力般最大問題係領隊堅恩唔掂，佢做助教嗰陣同球員關係唔錯，但自從上位後就大變臉，人緣變得非常差，依家堅恩重用新將係迫不得已，因為舊嗰批好多都唔聽佢支笛，造成球隊四分五裂，陣營內士氣極差，樂比仔深信佢一日唔走，布力般都好難得到重生。




樂比仔度波一向鍾意睇對賽往績，因為傳統智慧往往帶來啟示，阿仙奴近年曾多次向布力般展開大屠殺，包括前季贏過六比二，另外○八至○九年度兩循環淨勝八粒，今時今日要阿仙奴大勝唔容易，但未至於連一球都贏唔到啩？