細哨再孭飛巴西有計

猪拉多纳

14/09/2011
文： 亨格比利

歐聯之夜過後，聽朝有場分量十足嘅熱身賽等緊大家，由阿根廷主場硬撼巴西。呢場美洲超級打吡安排喺非國際賽期上演，意味住兩軍主帥都只能夠向本土搵食嘅球員埋手，不過論卡士同戰鬥力，由朗拿甸奴同尼馬領銜嘅巴西贏阿根廷幾條街，平手盤巴西客勝當然信得過。（開賽時間：周四早上8:50）




今仗係首屆美洲超級打吡，呢項盃賽同停辦多年嘅洛卡盃相似，都係由兩支南美洲巨頭交手，首回合先由阿根廷喺科爾多瓦出擊，28號嘅次回合就輪到巴西主場。由於今場熱身賽並非安排喺熱身賽期，雙方足總都冇權徵召海外球員，所以計牌面阿根廷真係幾削。


華朗 列基美「突然」打柴


睇番主帥沙貝拉今次點兵，原本列基美同華朗都在陣中，但早兩日先踢完阿甲嘅列基美日前以養傷為由退隊，到尋日華朗亦照辦煮碗，話自己有傷唔玩，中場突然冇咗兩位大將，加上今次阿根廷大軍足足有成10位新丁，經驗嚴重不足，睇嚟都係志在參與。


森巴攻擊鐵三角煞食


反觀巴西就好重視呢隻盃，領隊文奴文尼斯同班教練團上周日已經殺到科爾多瓦，目的係視察環境同傾研究戰術。近年唔少巴西球星都興提早回流，巴甲可以話係星光熠熠，好似鹹魚翻生嘅朗拿甸奴、新星尼馬同埋上仗對加納有波入嘅李安度達美奧都在陣，單係呢個攻擊鐵三角都夠照啦，對住隊牛奶仔阿根廷唔係贏唔到呀？