巴塞AC「大」顯身價

猪拉多纳

13/09/2011
文： Winning Kit

被視為今屆歐聯分組賽最矚目大戰嘅巴塞對AC米蘭，兩班波夾埋身價高達8.7億歐元（約92億港元），強手對壘肯定精彩。兩隊咁啱喺之前嘅聯賽都係以2:2摸和對手，今晚唔想捉錯用神，小妹寧撐1.46倍入球大好過！（有線61、201及中央5台周三凌晨2:45直播）


最矚目分組賽身價92億


啱啱個禮拜啲波爆到離晒大譜，場港甲南華輸畀屯門已經夠晒爆，估唔到夜晚連多蒙特、巴塞、國米都連環出事，次次都話歐聯前後多爆冷，中秋前真係咁猛？講番呢場巴A大戰，巴塞係4屆冠軍，AC就仲巴閉，曾經7次贏得「大耳朵盃」。至於講身價，「地上最強」全隊總值約6億歐元，「紅黑兵團」都值2.7億歐元，認真星光熠熠。




大戰當前口水戰特別多，羅賓奴就話撼贏對手無問題，領隊阿里基亦話自己雖然尊重巴塞，但一啲都唔驚佢哋。無疑硬漢加度素整親對眼之餘仲要停賽，伊巴謙莫域尋晚練波又突然拉傷大腿宣布唔踢得，但好彩佢哋前線仲有柏圖同卡斯辛奴，中場亦有阿古蘭尼派牌，火力依然唔曳！唯一要擔心係佢哋開季無耐，後防似乎唔多上力，早幾日場意甲咪畀拉素攻入兩粒囉！


伊巴謙練波拉傷唔踢得


巴塞有幾勁就唔使多講，不過佢哋有時可能太自滿掉以輕心，啱啱畀皇蘇逼和正因佢哋留力留出禍，加埋自己犯大錯以致失分，又有阿歷斯山齊士受傷，認真無癮！仲有小妹就硬係睇域陀華迪斯唔順眼，雖然佢最近季表現好咗，但總覺得佢信唔過。以巴塞嘅火力今仗主場點會唔喪攻？一於力撐入球大啦！