曼城連「根」拔起

猪拉多纳

10/09/2011
文： 亨格比利

新季3戰全勝勁入12球，曼城錄得創會以嚟最佳英超開局，今晚主場鬥韋根雖有歐聯後顧，但呢支「億萬大軍」勝在兵源雄厚，泰維斯（下圖左）仲有望擔正省靚招牌添，睇怕防線穿大窿嘅韋根都係凶多吉少，1.42倍「讓主」趁熱食。（有線202及302周六晚10:00直播）


韋根防線穿窿


曼城嚟緊周中會喺歐聯鬥拿玻里，唔排除領隊文仙尼會收起部分主力，不過米卡李察士已經傷愈、高路托尼坐完6個月波監可以候命、手指骨折嘅拿斯尼亦會戴保護罩落場，而且副選嘅阿當莊臣、巴洛迪利同占士米拿都係國腳級，即使半力出擊都高韋根幾班。




最重要係冇份踢國際賽嘅泰維斯，極可能會喺今場波擔正，佢歷來喺英超為曼城披甲4鬥韋根入咗4球，堪稱「韋根剋星」，「野獸」新季正選都冇埋，肯定想踢場好波出番啖氣，對住有一對守將艾卡拉斯同高賀利倦勤嘅韋根，隨時大開殺戒。何況韋根開季先後面對升班隊伍諾域治同史雲斯都要失分，防線唔掂，造訪曼城唔似會偷到雞囉！