英格蘭恰死威爾斯

猪拉多纳

06/09/2011
文： 朱楓

啱啱炒完保加利亞嘅英格蘭，今晚喺歐國外G組會返番主場鬥「鄰居」威爾斯。「三獅兵」上仗大換血效果理想，難得「林伯」被冷落一場後可能重新擔正，肯定大踢身價波，對住人腳參差嘅威爾斯，唔難取勝，1.39倍「讓球主勝」絕對熱得有理！（now671、672台及廣東體育周三凌晨2:45直播）


三獅兵贏波出線在望


由於近況麻麻兼傷兵多，英格蘭上場作客保加利亞索性大換血，改打4231陣式，搵柏加同巴利打雙防中，另外又派基斯史摩寧等新人擔正，點不知效果出奇地好，踢落比之前更快更流暢，最後大勝3:0非常合理。




今晚返番溫布萊鬥威爾斯，領隊卡比路當然想冧莊，因為英格蘭暫時喺G組排榜首，今仗只要贏威爾斯，最後一場作客和黑山都首名出線，而且「三獅兵」原來今年主場仲未開齋。不過據英國傳媒講，由於巴利同柏加再攞多1張黃牌就停賽，卡比路今仗可能會出番「林伯」，呢位鐵人上場4年嚟首次喺冇傷情況下喺國家隊被貶後備，假如今晚有得踢肯定搏到盡，加埋克服腳傷可以復出嘅大勇射手朗尼，即使前鋒戴倫賓特、後衞巴尼斯及米卡李察士啱啱因傷退隊，都冇乜影響。


威爾斯比拿美停賽


威爾斯日前主場爆冷以2:1擊敗「二哥」黑山，取得分組賽首捷，兼保住一絲出線希望，搞到班球員心都雄晒，主將加里夫巴利就揚言今晚可以令英格蘭失分，但老實講，威爾斯除咗巴利仔，就只得中場艾朗藍斯叫做有啲卡士，其餘唔係踢英超下游球隊，就係打英冠，何況今場仲有射手比拿美同中場禾漢停賽，點信得過呀！




歐國盃外圍賽G組