英幼獅狂噬以色列

猪拉多纳

05/09/2011
文： 亨格比利

喺夏天舉行嘅U21歐國盃慘烈出局後，英格蘭U21捲土重來，剛啱先喺來屆外圍賽大炒阿塞拜疆6蛋，領隊皮雅斯為保飯碗，當然要好好練兵，今晚喺班士利出擊同以色列U21拍跳，一眾「生牯仔」定必搏盡爭上位，1.83倍「讓主」抵捧。（now671台及廣東體育周二凌晨2:00直播）


大炒阿塞拜疆鬥心勁


查實喺去屆U21歐國盃小組出局之後，唔少傳媒都估領隊皮雅斯會引咎辭職，不過佢老人家就賴死唔走，隨即仲喺早排2013歐國盃外圍賽旗開得勝，大炒阿塞拜疆6:0，擺到明想做番齣好戲省靚招牌。呢場波阿歷士張伯倫、魯迪維爾同蘭斯貝利3位中場表現最生猛，預計佢哋會繼續擔正，聯同隊長佐敦軒達臣鎮守中場。




賽前皮雅斯就話，唔係隻隻「幼獅」都係大球星，坦承仲未清楚守將奇治戴臣、法拿根、韋斯當、中場舒維爾同巴克利有幾多料，所以會趁友賽試人，呢班「生牯仔」為博出位取悅皮雅斯，今晚唔搏等幾時？


以色列U21火力弱雞


對家以色列係2013年U21歐國盃主辦國，由於唔使踢外圍賽，佢哋近期都頻頻安排熱身賽練兵，不過表現就唔多理想，近兩仗對住烏克蘭同塞爾維亞都係輸波收場，對上4場國際賽仲一粒都入唔到添，鋒力真係弱到得人驚，睇怕就算「以色列美斯」阿蘇連再好波都難保至尊，造訪氣勢如虹嘅英格蘭聽輸鑊勁！