英格蘭U21換血唔慌多攻「細」

猪拉多纳

01/09/2011
文： 朱楓

今晚英格蘭U21喺U21歐國盃外圍賽第8組迎戰阿塞拜疆U21，唔似可以大勝！事關「幼獅兵團」近排大換血，基本上零默契，對住阿塞拜疆隨時老鼠拉龜，朱楓寧玩入球細！（now671台及廣東體育周五凌晨2:30直播）


阿塞拜疆U21冇鋒力


英格蘭U21喺今屆U21歐國盃外圍賽抽到好籤，同阿塞拜疆、比利時、冰島同挪威喺第8組，出線應該冇問題，不過朱楓覺得「幼獅兵團」初段會踢得比較辛苦，事關文切尼等主力都已超齡，啱啱獲續約2年嘅領隊皮雅斯，今次徵召12位新丁入伍接班，基本上成隊波要重新執過，好衰唔衰曼聯守將菲爾鍾斯仲臨時被提升上大國腳，曼聯前鋒韋碧克、阿仙奴中場費林邦同利物浦右閘馬田基利3大主力亦因傷退隊，得利物浦中場佐敦軒達臣孭飛，不宜過分高估。




同大國腳一樣，阿塞拜疆喺U21級別亦係魚腩兼冇鋒力，喺上屆U21歐國盃外圍賽第10組包尾出局，不過朱楓覺得佢哋今晚作客英格蘭，唔似會大敗，事關阿塞拜疆陣中有効力愛華頓嘅中場阿度拿耶斯，相信可以提供有用軍情畀領隊艾斯利，盡量減低失球數字。