王者爭霸撐葡軍

猪拉多纳

20/08/2011
文： Mic少

在哥倫比亞舉行嘅世青盃終於來到決賽，巴西U20對葡萄牙U20，兩個國家歷史關係千絲萬縷，巴西曾經係葡國殖民地，大家講相同語言，領隊、球員一開聲，對手就立即意會到，迅速作出應對，到時戰局好可能拉鋸，巴西想喺九十分鐘贏波相當困難，捧受讓嘅葡萄牙「讓球客勝」。（周日早上9時開賽）




兩隊打得入決賽，實力自然有番咁上下，巴西W竟然熱到1.65倍，又要讓波，好大程度上受「足球王國」之名所累，至於實際上「森巴小旋風」是否真係高過葡萄牙咁多，實在令人懷疑。其實青年級賽事，後生仔實力分野唔會太大，往往都係長大成熟後，先至會拉開距離，所以巴西根本被高估。


防︰6戰0失 攻︰一針見血


葡萄牙氣勢上唔及巴西，事關佢哋今屆只有五球進帳，僅及巴西三分之一，但要留意葡國六戰未失過波，屬於典型穩守突擊高手。葡萄牙四強對法國，六次射門就攻入兩球，反而法國十九次射門卻捧蛋。巴西攻力強，唔代表贏到葡萄牙，如果一個唔留神，更隨時會被葡國偷襲得手。如果今場法定時間九十分鐘打和，會加時三十分鐘，再和就以互射十二碼分勝負。