|
09/08/2011
文: 力奇
今晚有場熱身賽喺倫敦屈福特中立場上演,由加納大戰尼日利亞,賽前「超霸鷹」因簽證問題,有4名主力被拒入境被迫缺陣,加上主將如奧丹維治同約翰米基爾都話有傷未必踢得,呢隻「甩毛鷹」仲飛唔飛得起真係難講?我捧2.35倍加納W。(開賽時間:周三凌晨2:30)
尼日利亞4將被拒入境
兩支老牌非洲足球強國,齊齊為嚟緊嘅非國盃外圍賽做準備,可惜「超霸鷹」主力包括門將安耶馬、守將伊菲岩布斯、中場奧古迪同前鋒伊奧臣全部都申請唔到Visa入境,主帥施亞斯亞雖然鬼殺咁嘈,但都無補於事,最後只能夠補選守將薛圖入伍。更加陰功係,車仔中場約翰米基爾喺日前熱身賽又勇戰受傷,之前同主帥有拗撬但講和咗嘅奧丹維治,又因傷上陣成疑,殘陣出擊,憑乜贏波?
「黑星」呢邊,今次召入幾名新丁都要博表現上位,包括喺挪威長大嘅門將卡華利斯同布里斯托城快翼艾度馬等,都係潛質唔差之輩。何況主將如阿休、基恩同蒙達利等均在陣,就算話奇雲保定同艾辛養傷,都冇有怕啦!
|
|