|
18/07/2011
文: 蘇豪
日職今日有場獨腳戲,廣島三箭主場對福岡黃蜂,三箭連輸兩場,後防表現唔多穩陣。黃蜂上場又贏,但球隊聯賽作客八戰狂失廿球,表現唔掂,兩隊後防鬥渣,捧1.6倍大盤最好!(now 633周一下午5時直播)
廣島三箭近期戰績轉差,對上五場聯賽兩勝三負,近兩場聯賽同樣輸一比三,主要衰在後防表現曳,大軍近五戰失十三球,前面入埋唔夠輸。三箭防線向來唔夠人用,主力水本裕貴長期養傷,令情況變得更壞,近期日職賽程頻密,其餘守將疲態畢露,自然未能發揮水準,今次對住弱旅福岡黃蜂,將會以攻代守。
另一邊廂福岡黃蜂演出續有起色,近三場聯賽兩度贏波,終於有番多少戰鬥力。不過大家要留意一點,黃蜂兩場勝仗靠主場取得,球隊今季聯賽作客八戰一和七負,合共失廿球,曾以一比四負於磐田山葉,亦被名古屋鯨魚大數五比二,幸好仲識入波。兩軍後防弱不禁風,相信今場會有唔少士哥,大盤值得一試。
日乙溫泉借飛翔反彈
同日日乙賽事草津溫泉主場對鳥取飛翔,溫泉早前將主力射手拉芬夏借去大阪飛腳,前線少咗個入球主力,不過,大軍仲有阿歷士漢歷基、萬代宏樹及前田雅文等前鋒在陣,調配唔成問題。溫泉近況平平,對上五場聯賽一和四負,今次面對弱旅鳥取飛翔將全力博翻身,飛翔近三次作客全敗,反抗能力不大,捧溫泉主W啱數!
|
|