|
10/07/2011
文: 走肖
廣島三箭今晚喺日職對大阪櫻花,唔係普通聯賽咁簡單,每年三箭都會趁暑假,搞活動吸引球迷入場,今年佢哋嘅主題係「夏日衝擊」,希望7月份嘅3場主場賽事谷起入座率,對家櫻花有射手洛迪高賓柏奧停賽、中場路爾斯馬天尼斯受傷,失去森巴力量要唔過。(now633台周日晚6:00直播)
最近三箭射手李忠成同歌星女友ICONIQ甩拖,腳風冇季初咁順,但日本消息話,重返德甲嘅哈化柏林好想開拓亞洲市場,同時打算強化前線陣容,所以睇中李忠成,仲準備正式提出斟介,相信佢會盡快收拾心情踢好波博轉會。更重要係,三箭近期踩行油宣傳,希望趁7月旺季吸納更多球迷,今場會有活動同大抽獎,相信高層會落柯打要求球員省靚招牌。
櫻花兩森巴兵傷停
另一方面,櫻花上星期以5:0狂數榜首嘅柏雷素爾,的確好威,但如果唔係對方半場已經打少個,相信櫻花唔會贏得咁盡,而且大勝之後,今場櫻花有射手洛迪高賓柏奧、中場路爾斯馬天尼斯分別停賽同養傷,冇咗巴西力量支持,今場要搶分真係唔容易,特別係佢兩個係櫻花陣中嘅必然正選,突然同時缺陣,教練古爾比肯定頭痕,今場嘔晒3分出嚟絕對唔出奇。
|
|