阿根廷頭炮請食早餐

猪拉多纳

01/07/2011
文： Mic少

第四十三屆美洲國家盃將於周六早上開鑼，揭幕戰由A組主辦國阿根廷迎戰玻利維亞。阿根廷過去兩屆都屈居巴西之下，今屆首仗出擊必然全力打響頭炮。尤其係阿根廷兩年前作客玻利維亞高原曾慘敗一比六，今鋪必盡炒對手報仇。阿根廷「讓球主客和」讓二球，Mic少捧「讓球主勝」。（有線61及201台周六早上8時45分直播）




阿根廷同烏拉圭都係美洲國家盃史上奪冠次數最多球隊，但阿根廷對上一次捧盃已經係九三年，反觀巴西近五屆四次奪冠，令阿根廷甚為不是味兒。阿根廷相隔二十四年再次主辦賽事，全國上下都抱有好大期望，對冠軍寶座志在必得。


主場績靚勢報「1:6敗仇」


阿根廷領隊巴迪斯達備戰計劃好有心思，之前選一批邊緣國腳踢熱身賽，一方面透過內部競爭揀選最佳人腳，另一方面可以畀美斯及泰維斯等主力休息。表面上熱身賽成績唔好，但其實非常奏效，上仗熱身賽強陣出擊即大炒阿爾巴尼亞，美斯、泰維斯、阿古路及拿維斯均有建功，證明佢哋已叉足電，準備大開殺戒。




玻利維亞最令人深刻印象係利用主場高原氣候製造爆冷賽果，最經典莫過於○九年世界盃外圍賽大炒阿根廷六比一，但佢哋過去四次作客阿根廷全敗收場，近兩次都係輸○比三。玻利維亞今次人腳絕大部分効力本土聯賽球隊，拍埋阿根廷星級陣容完全唔入流。