柏雷素爾狂鋒掃甲府

魑魅魍魉

25/06/2011
文： 走肖

兩支日職升班球隊，今晚會正面對撼，甲府風林喺主場對柏雷素爾，3分未必袋得穩，事關今季甲府依然係靠身高1米94嘅中鋒夏雲拿屈機，路數好容易被對手睇通，相反柏雷素爾攻擊點就夠晒多，射手田中順也又即將得到日本國家隊徵召，鬥心夠強2倍客W值得捧場。（now633及660台周六晚6:00直播）




上季夏雲拿喺日乙攻入19球成為神射手，帶領甲府升班，今季佢喺日職有6球進帳，表現算對辦，但佢啲隊友幾乎幫唔到手，夾埋入得5球，進攻單調係甲府暫時得2勝5和5負要護級嘅致命傷。


田中順也勢升大國腳


對家柏雷素爾就勁咯，目前8勝1和3負坐喺榜首，前鋒田中順也、射手北島秀朗、中場李安度杜明基斯同佐治韋拿都有好表現，夾埋攻入18個聯賽入球，當中上年至大學畢業嘅田中順也勁入6球，據聞日本教頭沙哲朗尼打算搵埋佢備戰8月10日對南韓嘅熱身賽，佢今場肯定搏命證明自己。