德甲8‧6搶閘開鑼

魑魅魍魉

22/06/2011


德甲將於香港時間八月六日凌晨開咧，上季盟主多蒙特主場惡鬥漢堡。至於上季四大皆空嘅拜仁慕尼黑，首戰對慕遜加柏，到第十三輪於安聯球場迎戰「蜜蜂兵團」，將會係首循環焦點。


多蒙特漢堡打頭陣


首輪德甲已經充滿話題性，多蒙特首戰就要對前中後三線大執嘅漢堡，預計會遇到一定阻力，拜仁則會主場對上季奇迹護級成功嘅慕遜加柏，新加盟門將紐亞及後衞拿菲爾將會首度亮相，為新教練軒基斯打天下，而上季攞到歐洲賽入場券嘅緬恩斯就會主場對「二哥」利華古遜。




多蒙特同拜仁將於第十三及三十輪對戰，首循環先由拜仁在安聯主場擺擂台，呢兩場關鍵戰或會決定冠軍誰屬。