哈利仔彈起舒利亞後繼有人

猪拉多纳

好多球迷對家喻戶曉嘅超級巨星，總係特別重視及憧憬，但筆者作為講波佬同埋以前做教練，卻會積極發掘明日之星，為球壇帶來新衝擊。由於Peter今季有做意甲評述，早已對祖雲達斯前鋒艾華路莫拉達有好深印象，教頭阿里基經常用佢取代洛蘭迪夥拍泰維斯打正選，而且頻頻入波，昨日凌晨呢位皇馬青訓產品，又為西班牙對烏克蘭一箭定江山，另一新星艾斯高則充當中場指揮官，令失意巴西世盃嘅「鬥牛國」重現生氣，西班牙領隊迪保斯基果然獨具慧眼。

至於人氣爆燈嘅英格蘭超新星哈利卡尼，昨日凌晨喺歐國外對立陶宛為「三獅兵團」處子登場，後備入替兩分鐘唔夠第一次掂波即取得士哥，呢位熱刺射手今季喺各項賽事共轟30粒，腳風勁順，相信由佢夥拍隊長朗尼，會係未來英格蘭前鋒線最佳組合。哈利仔雖非傳統英式衝撞型中鋒，但絕對係一部入球機器，希望哈利仔繼續努力，有朝一日可以去到名宿舒利亞嘅級數啦！
四蘭大戰玩和波過關

講番今晚嘅波，Peter認為「四蘭」交鋒將會和氣收場，分別係歐國外D組愛爾蘭主場對波蘭，以及F組北愛爾蘭主場對芬蘭，不妨整番條和波2串1或2串3。
金句：唔要緬懷過去巨星，而係發掘明日之星